ÇAXNAQLAR NEFT YATAĞI – Abşeron y-a-nın şm.-q. hissəsində, Abşeron neftli-qazlı r-nunda, Bakı ş.-ndən 9 km q.-də yerləşir. Struktur Binəqədi antiklinalının davamı olub, monoklinal quruluşa malikdir. Sahə axtarış-kəşfiyyat işlərinə 1925 ildə daxil edilmişdir. Strukturun ölçüləri Qırmaki lay dəstəsi üzrə 3,5×1,8 km təşkil edir. Yataq 1937 ildə açılmış, 1938 ildə işlənməyə daxil edilmişdir. İşlənmənin ilk illərində Qırmaki lay dəstəsi, sonralar isə (1939 ildən) Qırmakialtı lay dəstəsi istismara daxil edilmişdir. Yatağın geoloji quruluşunda Məhsuldar qatın Qala lay dəstəsindən başqa bütün lay dəstələri iştirak edir. Yataq ərazisində Məhsuldar qatın ümumi qalınlığı 1180 m-dir; gilli və qumlu layların növbələşməsindən ibarətdir. Məhsuldar layların yatma dərinliyi 470–1280 m arasında dəyişir. İşlənmədə olan laylara müxtəlif illərdə suvurma prosesi həyata keçirilmişdir. Kollektorların məsaməliyi 24–25%, keçiriciliyi 0,058 mkm2-dir. Neftin sıxlığı 912 kq/m3, tərkibində parafinin miqdarı 0,24%, asfaltenlər 1,34%, qatran 33%-dir. İşlənmənin əvvəlindən 1.1.2011 il tarixinə cəmi 7,9 mln. t neft, 0,7 mlrd. m3 qaz hasil edilmişdir.