ÇARNOKİT (Kəlkətə ş.-nin əsasını qoyan C. Çarnokanın adı ilə) – süxur; mikroklinli qranitin hiperstenli növü. Kalium çöl şpatlarından (15–20%), oliqoklazdan (təqr. 50%), kvarsdan (təqr. 30%) və hiperstendən (2–7%) ibarətdir. Tərkibində həmçinin qranat, diopsid, biotit, hornblend, aksessor minerallardan maqnetit, apatit, zirkon və s. iştirak edir. Rəngi tünd, nadir hallarda mavi çalarlı açıq bozdur. Qranit allotriomorfdənəli, bəzən porfir strukturludur. Metasomatik mənşəli hesab olunur. “Ç.” termini ilk dəfə 1900 ildə ingilis geoloqu T. Holland tərəfindən təklif olunmuşdur.