ÇÉRSKİ Ivan Dementyeviç (Yan Dominikoviç) (15.5.1845, Vilna qub.-ndakı “Svolna” malikanəsi – 7.7.1892) – geoloq, paleontoloq, coğrafiyaşünas; Sibirin tədqiqatçısı. Milliyətcə polyakdır. 1863–64 illərdə Polşa üsyanında iştirakına görə Omsk ş.- nə orduya göndərilməklə cəzalandırılmışdır. Q.N. Potaninin təsiri ilə Omsk r-nunda geol. və paleontoloji tədqiqatlara başlamışdır. 1871 ildə İrkutsk ş.-nə köçmüşdür. 1877–80 illərdə Baykal sahillərinin geol. quruluşunu öyrənmiş və geol. xəritəsini tərtib etmişdir. 1878 ildə Ç. relyefin təkamülü fikrini irəli sürmüşdür. Sibir üçün ilk tektonika-paleocoğrafiya sxemlərindən (sonralar E. Züss “Yerin siması” əsərində istifadə və inkişaf etdirmişdir) birini təklif etmişdir. 1885 ildə Peterburq EA-nın dəvəti ilə Peterburqa köçmüşdür. 1891 ildə oradan Kolıma və İndigirka çayları r-nundakı ekspedisiyaya yola düşmüşdür. Kolımanın aşağı axınlarını öyrənərkən vəfat etmişdir. Saxa (Yakutiya) Resp.-nda və Maqadan vil.-ndə dağ sistemi, Baykalarxasında silsilə Ç.-nin şərəfinə adlandırılmışdır.                                                        Əd.: Обручев В.А. Иван Дементьевич Черский, в кн.: Люди русской науки, Т– 1, М.– Л.,1948.