DÁRRELL (Durrell) Lorens Corc (27.2.1912, Hindistan, Darjilinq – 7.11.1990, Fransa, Somyer) – ingilis yazıçısı. C. Dar­rellin qardaşıdır. Hindistan və İngiltərənin özəl məktəblərində (1923–30) oxumuşdur. İsgəndəriyyədə Britaniya konsulluğunun əməkdaşı (1941–47), Belqradda Britaniya səfirliyinin mətbuat katibi (1949–52), Nikosiyada ictimaiyyətlə əlaqələr üzrə zabit (1952–56) olmuşdur. Әdəbi debütü “Qəribə fraqment: 16–19 yaşlarında yazılmış şeir­lər” (1931) toplu­sudur. H.Millerin təsiri altında yaz­dığı “Qara kitab: Çəkişmə” (1938) romanını D., ədəbi yaradıcılığının əsl başlanğıcı hesab edirdi. “İsgəndə­riyyə kvarteti” tet­ralogiyasının (“Justina”, 1957; “Baltazar”, 1958; “Mauntoliv”, 1958; “Klea”,1959) nəşri D.-­ə böyük şöhrət qazandırdı. İlk üç romanında D. İkinci dünya müharibəsi ərəfəsində İsgəndəriyyədəki həyatı müxtəlif nöqteyi­nəzərdən təsvir etmişdir. “Afrodi­tanın qiyamı” dilogiyası (“Tunc”, 1968; “Nunquam”, 1970) müasir cəmiyyətdə mədəniyyət problemlərinə həsr olunmuş­dur. “Monsenyor, yaxud Cəhalət knyazı” (1974), “Liviya, yaxud Diri­diri basdı­rılmış” (1978), ”Konstans” (1982), “Se­bastyan, yaxud Hər şeyə üstün gələn ehtiraslar”(1983) romanları D. yaradıcılığının “Avinyon kvinteti” silsiləsinə daxildir. Adalar haqqında lirik­etnoqrafik oçerkləri var.