DÁYKA (ing. dike və ya dyke – sədd, daş divar) – intruziv maqmatik süxurların yatım formalarından biri. Paralel müstəvilərlə hüdudlanır. D. maqmanın yer qabığındakı şaquli və maili çatlarda soyumasından əmələ gəlir. Yerləşdiyi ətraf süxurlara nisbətən bərk olur və onlar aşındıqda D. divar kimi görünür. D.-nın qalınlığı bir m-dən onlarla m-ədək, uz. isə onlarla m-dən yüzlərlə km-ədək olur. Әmələ gəlməsinə görə üç genetik qrupa bölünür: maqma ərintisinin şaquli, yaxud maili çatları doldurması nəticəsində əmələ gələn e n d o d a y k a l a r, flüidlərin təsirindən mеtasomatik yolla əmələ gəlmiş m e t a d a y k a l a r, çöküntü və vulkanik qırıntı materialların çatları doldurması nəticəsində əmələ gələn e k z o d a y k a l a r. Təktək və qrup D.--lara (radial, həlqəvi və paralel D.-lar kompleksi) rast gəlinir. Radial və həlqəvi D.-lar, əsasən, intruziv massivlər və vulkanlarla əlaqədardır. Paralel D.-lar kompleksi orta okean silsilələrində intişar tapmışdır.
