DӘNİZ GEOFİZİKİ KӘŞFİYYATI – dəniz geofizikası üsulları ilə akvatoriyalarda faydalı qazıntıların axtarışı və kəşfiyyatının aparılması, həmçinin mühəndis geologiyası məsələlərinin həlli. D.g.k. kontinentlərin şelf və yamaclarında və Dünya okeanı yatağında geofiziki aparat larla, radionaviqasiya vasitələri ilə, daxil olmuş məlumatları emal etmək üçün bort kompyuterləri ilə təchiz olunmuş ekspedisiya gəmiləri vasitəsilə yerinə yetirilir. Sahilyanı zonalarda qurudan dəniz və okeanların dibinə doğru uzanan perspektivli yataqların (Baltikayanı ərazilərin kəhrəbalı gil layları, Saxalinin kömürlü layları və neftli strukturları, Xəzəryanı ovalığın və Şimali Xəzərin neftli-qazlı strukturları, Yamal y-a-nın qaz yataqları və s.) kəşfiyyatı aparılır. Ağır mineralların dəniz və okeanların sahilyanı zonalarında, iri çayların deltalarında formalaşan səpinti yataqlarının kəşfiyyatında kompleks geofiziki üsullar tətbiq olunur. Şelf akvatoriyalarında dəmir filizi və misnikel yataqlarının axtarışında dəniz maqnit kəşfiyyatından istifadə olunur. Dünya okeanının dərinliklərində dəmirmanqan konkresiyası, rift zonalarında massiv sulfid filizi yataqlarının sistemli kəşfiyyatı aparılır; kəşfiyyatın ilk mərhələsində kompleks geofiziki üsullarla yatağın konturları müəyyənləşdirilir, sonrakı mərhələdə isə geol. sınama (nümunəgötürmə) işləri yerinə yetirilir. Şelf və kontinent ya maclarında neft və qaz yataqlarının axtarışı və kəşfiyyatı geol., geofiziki, geokimyəvi üsullar kompleksi və buruq qazıması ilə müşayiət olunur. Akvatoriyalarda neft və qaz yataqlarının birbaşa axtarışında həmçinin yüksəkdəqiqlikli dəniz maqnit qradiyenti planaalmasından istifadə olunur.
Dəniz maqnit kəşfiyyatı həmçinin mühəndis geologiyası məsələlərinin həllində, ilk növbədə sualtı obyektlərin (batmış gəmilərin, təyyarələrin, minaların və s.) aşkar olunmasında geniş tətbiq olunur.
Əd.: Ш а п и р о в с к и й Н.И., Г а д ж и е в Р.М. Морская геофизическая разведка. Баку, 1962.
