DӘNİZ GEOLOGİYASI – Dünya okeanı və dəniz suları altında qalan Yerin tərkibini, quruluşunu və geoloji tarixini öyrənən elm. D.g. geol. elmlərin əsas bölmələrini (dinamiki geologiya, litologiya, mineralogiya, stratiqrafiya, paleontologiya, tarixi geologiya, geomorfologiya, tektonika, vulkanologiya, petrologiya, mühəndis geologiyası, faydalı qazıntılar geologiyası və s.) əhatə edir. Tədqiqat sahəsi Yer səthinin 70%-dən çox hissəsini əhatə edən okeanik Yer qabığıdır. D.g. dəniz və okeanların dibini təşkil edən çöküntülərin, maqmatik və metamorfik süxurların əmələgəlmə proseslərini, okean qabığının tektonik və geodinamiki tədqiqini, Yerin dərinlik quruluşunu, vulkanizmi, okeankontinent keçid zonasını, faydalı qazıntıların əmələgəlmə və yerləşmə qanunauyğunluqlarını tədqiq edir. Şelf zonalarının, kontinent yamaclarının, okean və kontinentlərarası keçid zonalarının öyrənilməsi mühüm praktiki əhəmiyyət kəsb edir, belə ki, bir sıra neftli-qazlı hövzələr, dəmirmanqan konkresiyaları, kükürd, daş kömür yataqları, qızıl, almaz və d. faydalı qazıntıların səpinti yataqları bu zonalarla əlaqədardır. 21 əsrin əvvəlində Dünyada hasil olunan neft və yanar qazın təqr. 33%-i şelf və kontinent yamaclarının payına düşmüşdür. D.g., həm çinin dənizdə hidrotexniki qurğuların mühəndisgeol. əsaslarının hazırlanması, sualtı zəlzələlərin qeydə alınması və proqnozlaşdırılması, onlarla əlaqədar sunami dalğaları və b. məsələlərlə də məşğul olur.
Qalın su qatı altında qalan dəniz dibinin öyrənilməsində exolotlarla, geofiziki aparatlarla, dib relyefini öyrənmək üçün foto və kinoaparatlarla, müxtəlif tipli nümunəgötürücülərlə, dalğıc vasitələrilə, sualtı aparatlarla təchiz olunmuş elmi-tədqiqat gəmilərindən, dayaz ərazilərin öyrənilməsində isə Yerin süni peykindən və sualtı observatoriyalardan istifadə olunur.
