ENTEROBİÓZ (entero... + βίος – hәyat) –nematodozlar qrupundan әn çox yayılmış helmintoz növü. Törәdicisi bizquyruqdur (Enterobius vermicularis). Ağ rәngli kiçik qurd olan bizquyruğun dişilәrinin uz. 10 mm-ә, erkәklәrininsә 5 mm-ә çatır. Bәdәninin ön qurtaracağında ağız dәliyi ilә әhatәlәnmiş vezikulanın (şişkinliyin) kömәyilә bağırsaq divarına yapışır. Bağırsaq möhtәviyyatı ilә qidalanan bizquyruq qan udmaq bacarığına malikdir. İnsanda korbağırsaqda vә soxulcanabәnzәr çıxıntıda yaşayır. Bizquyruqla yoluxmada çirkli әllәr әsas rol oynayır. Ona görә dә E.-la daha çox kiçikyaşlı uşaqlar xәstәlәnirlәr. Orqanizmdә bizquyruğun olmasının әsas әlamәti çox vaxt axşam vә gecә vaxtı özünü büruzә verәn anusәtrafı qaşınmadır. Valideynlәr uşağın yuxusunu diqqәtlә müşahidә etmәli vә bu әlamәt baş verdikdә dәrhal dehelmintizasiya aparılması üçün tәdbir görmәlidirlәr.
Müalicәsinin mühüm elementi antihelmint preparatların qәbulundan әlavә gigiyenik tәdbirlәrdir: әllәrin tәmiz yuyulması, dırnaqların qısa kәsilmәsi, dәyişәyin isti suda yuyulması, isti ütü ilә ütülәnmәsi vә s.
