ENTEROPEPTİDÁZA (qәdim  yun. έντερον – bağırsaq + πεπτος – bişirilmiş, hәzm olunmuş), enterokinaza – endopeptidazalar qrupundan olan proteolitik ferment; tәrkibindә karbohidratlar (35% qlikoproteid) olan mürәkkәb zülal. Bәzi mәmәli heyvanlarda vә insanda tapılmışdır.

E. onikibarmaq bağırsağın selikli qişa hüceyrәlәri tәrәfindәn hasil edilir vә mәdәaltı vәzinin şirәsi ilә daxil olan tripsinogeni zülalları parçalayan aktiv tripsin fermentinә çevirir. Bu zaman әmәlә gәlәn tripsin öz növbәsindә tripsinogeni vә mәdәaltı vәzi şirәsinin bütün digәr proteolitik fermentlәrini aktivlәşdirir. Fermentativ xassәsi özünü ancaq qәlәvi mühitdә büruzә verir. E.-nın miqdarı çox az olduğundan onun qidanın hәzmindә bilavasitә iştirak etmәsi cüzidir, hәddәn artıq çatışmadıqda diareya, steatoreya, arıqlama, anemiya, zülal mübadilәsinin pozulması, hәzm pozuntusu baş verir.