ERBİUM  (İsveçdәki  İtterbyu  kәndinin adından; lat. Erbium), E r – kimyәvi element. Elementlәrin dövri sisteminin III qrupundadır; nadir-torpaq elementlәrә (NTE) aiddir, at. n. 68, at. k. 167,26-dır. Tәbiәtdә 6 stabil izotopu vardır: ¹⁶²Er (0,14%),¹⁶⁴Er (1,61%), ¹⁶⁶Er (33,6%), ¹⁶⁷Er (22,95%), ¹⁶⁸Er (26,8%), ¹⁷⁰Er (14,9%). Yer qabığında miqdarı kütlәcә 3,3∙10^–4%, dәniz suyunda 6∙10^–7mq/l-dir. Digәr NTE ilә birlikdә ksenotim, evksenit, monasit, bastnezit, loparit, ortit vә s. mineralların tәrkibindә olur. E.-u 1843 ildә K.Mosander kәşf etmişdir.

E. atomunun xarici elektron tәbәqәlәrinin konfiqurasiyası 4f¹²5s²5p⁶6s²; oksidlәşmә dәrәcәsi +3, nadir hallarda +1 Polinqә görә elektromәnfiliyi 1,24; atom radiusu 0,175 nm-dir; E. gümüşü-ağ metaldır; t_әr.1522°C, t_qayn.2510°C; sıxlığı 9,062 q/sm³; kompakt (ovuntusunun sıxlaşdırılmasından vә emalından alınan) E. havada tәdricәn oksidlәşir; rütubәtli havada qızdırıldıqda bir qәdәr tez oksidlәşir; mineral turşularla duzlar әmәlә gәtirir. Qızdırıldıqda E.-un oksigen, halogenlәr, xalkogenlәr, N₂ vә  H₂ ilә qarşılıqlı tәsirindәn Er(III) birlәşmәlәri alınır. Müxtәlif üzvi vә qeyri-üzvi liqandlarla E(III) ionu koordinasiya әdәdi 9-dan 15-ә qәdәr olan birlәşmәlәr әmәlә gәtirir. E. NTE-in tәbii qarışığından ekstraksiya vә xromatoqrafiya metodları ilә ayrılır. Metallik E. metaltermiki  vә  ya  elektrokimyәvi  üsullarla flüorid vә xloridlәrdәn alınır. E.-un kompleks birlәşmәlәri NTE-nin ayrılması vә tәmizlәnmәsindә, lantanoid vә aktinoidlәrin ayrılmasında vә s. tәtbiq edilir.