ERKİN Ülvi Camal (14.3.1906, İstanbul – 15.9.1972, Ankara) – türk bәstәkarı, pianoçu, dirijor vә pedaqoq. Uşaq olarkәn anasından fp. çalmağı öyrәnmişdir. E. Qalatasaray liseyini bitirdikdәn sonra Tәhsil Nazirliyinin tәqaüdçüsü kimi Paris Kon servatoriyasında (1926–28) vә “Ekol normal”da (1929–30) J. vә N.Qallonların sinfindә kompozisiya, N.Filipdәn fp. dәrslәri almış, hәmçinin N.Bulanjedәn kompozisiyanı öyrәnmişdir. Vәtәnә qayıtdıqdan sonra (1930) Ankara Pedaqoji Musiqi Mәktәbindә (harmoniya vә fp.), 1936 ildәn Ankara Konservatoriyasında (fp. sinfi) dәrs demişdir. 1960–70 illәrdә Ankara Konservatoriyası ork.-nin vә Opera Teatrının dirijoru olmuşdur. 1971 ildә Dövlәt sәnәtkarı adını almışdır. Parisdә başladığı “İki dans” adlı әsәrini Ankarada tamamlamış, premyerası 1931 ildә Rәyasәti-Cumhur Filarmoniyasında olmuşdur. E. Ankara Dövlәt Konservatoriyasında fp. bölmәsinin rәhbәri (1936–49), 1949–57 illәrdә isә rektoru vәzifәlәrindә çalışmışdır. Bәstәkar Necil Kazım Akseslә birlikdә “Karmen”, “Aida”, “Fidelio” kimi bir çox mәşhur opera әsәrini türk opera repertuarına daxil edәrәk, sәhnәyә qoymuşdur. Bәstәkarların 1943 il müsabiqәsindә iki konsertlә çıxış etmiş, “Fp. üçün konsert”i mükafata layiq görülmüşdür. Müasir musiqinin ifadә vasitәlәrindәn istifadә edәn E. 2 simfoniyanın, violin, fp. ilә ork. üçün konsertlәrin, caz kvarteti, ork. üçün rapsodiya vә digәr әsәrlәrin müәllifidir Xalq musiqisinә bağlılıq E. yaradıcılığına xas xüsusiyyәtdir. O, milli cәhәtlәri müasir bәstәkarlıq texnikası vasitәlәri ilә ustalıqla uzlaşdırırdı. Çox vaxt әsәrlәrinin ifaçısı kimi çıxış edirdi. 1963 ildә Bakıda konsertlәr vermişdir.