ERLÁNGER Cozef (5.1.1874, San-Fransisko – 5.12.1965, Sent-Luis, Missuri ştatı) – Amerika fizioloqu, elektrofiziologiyanın banilәrindәn biri. Nobel mükafatı laureatı (1944, Q.Hasserlә birgә). ABŞ Milli EA-nın üzvü. Kaliforniya Un-tini bitirmişdir (1895). Cons Hopkins Un-tindә işlәmiş (1900–06), 1906–10 illәrdә Viskonsin ştatında un-tin fiziologiya şöbәsinin prof. vә rәhbәri, 1910–46 illәrdә Sent-Luisdә (Missuri) Vaşinqton Un-tinin fiziologiya şöbәsinin prof. vә rәhbәri olmuşdur. Əsas әsәrlәri sinir hüceyrәlәrindә vә liflәrindә bioelektrik hadisәlәrinin öyrәnilmәsinә hәsr edilmişdir. Birinci olaraq katod osilloqrafından istifadә etmiş vә onun qeydiyyatı üçün orijinal metod işlәyib hazırlamışdır. Arterial tәzyiqin vә ürәkdә qan dövranının qansız qeyd olunması üsulunu tәtbiq etmәklә ürәk-damar fiziologiyasına mühüm töhfәlәr vermişdir. Ürәk blokadasının mahiyyәtini öyrәnmişdir. 
Ə s ә r l ә r i: Symposium on the synapse, Balt., 1939 (digәrlәri ilә birlikdә); Electrical signs of nervous activity, Phil. –L.–Oxf., 1937 (H.S. Gasserlә birlikdә).