ETİLENXLORHİDRÍN,   2-xloretanol, β-xloretil spirti, etilen qlikolun xlorhidrini – üzvi birlәşmә, HOCH₂CH₂Cl; xoş efir iyli, rәngsiz maye; t_qayn. 128,7°C. Su, spirt vә efirlәrlә bütün nisbәtlәrdә qarışır, su ilә azeotrop qarışıq әmәlә gәtirir. E. hәm spirtlәr, hәm dә karbohidrogenlәrin halogentörәmәlәri üçün sәciyyәvi olan reaksiyalara girir. E. qәlәvi agentlәrin iştirakında su ilә qızdırıldıqda etilenqlikola qәdәr asan hidroliz olunur. E.-in HNO₃ vә ya CrO₃ ilә oksidlәşmәsindәn ClCH₂COOH; Ca, Na, Ba hidroksidlәri ilә qarşılıqlı tәsirindәn etilenoksid; karbon turşuları ilә efirlәşmә reaksiyasından RCOOCH₂CH₂Cl alınır. Alkoqolyatlarla monoefir etilenqlikollar, sulu NH₃ ilә mono-, divә trietanolaminlәrin qarışığını; birli vә ikili aminlәrlә etanolaminlәrin törәmәlәrini; yüksәk temp-rda qәlәvi metalların duzları ilә xloral әmәlә gәtirir.

E.-i sәnayedә etilendәn alınır. E.-in sulu mәhlulu antifrizdir; susuz E. sәnayenin lak-boya vә digәr sahәlәrindә tәtbiq edilәn sellüloz efirlәrinin hәlledicisidir. Etilenqlikolun vә onun törәmәlәrinin, etanolaminlәrin alınması üçün istifadә edilә bilәr.

E. sinir sisteminә vә maddәlәr mübadilәsinә güclü tәsir edir, selikli qişanı qıcıqlandırır. Partlayış vә yanğın  tәhlükәlidir.