ETİLENOKSİD, o k s i r a n, 1,2-epoksietan, etilenoksidi – üzvi birlәşmә; rәngsiz qaz, yaxud xarakterik efir iyli maye;  t_әr.–112,5°C, t_qayn. 10,7°C.

Suda, etanolda, karbohidrogenlәrdә vә digәr üzvi hәlledicilәrdә yaxşı hәll olur. E. üçün tsiklin  açılması ilә müşayiәt olunan reaksiyalar sәciyyәvidir. Nukleofil reagentlәrlә әksәr reaksiyaları  aralıq oksonium kompleksin әmәlә gәlmәsi ilә gedir. E.-in әsasi katalizatorların iştirakı ilә  hidratlaşmasından etilenqlikol alınır. E. sulu mühitdә hidrogen-halogenidlәrlә halogen-hidrinlәr; spirtlәrlә sellozolvlar, az miqdarda su iştirakında NH₃ ilә mono-, di- vә ya tri- etanolaminlәrin qarışığını; dialkiletanol- aminlәrlә polietilenqlikolların amintörәmәlәrini; HCN ilә (qәlәvilәrin iştirakında) etilensianhidrin; üzvi turşularla vә ya onların anhidridlәri ilә  etilenqlikolların mono- vә diefirlәrini; SnCl₂ vә ya BF₃ iştirakında aldehid vә ketonlarla tsiklik asetat vә ketallar әmәlә gәtirir. E.-in polimerlәşmәsindәn polietilenoksidlәr, dimerlәşmәsindәn 1,4-dioksan alınır. E.-in alınmasının әsas sәnaye üsulu etilenin oksidlәşdirilmәsidir. E. әsas üzvi sintezin mühüm mәhsuludur. Etilenqlikol, halogenhidrin, etanolamin, dioksan, feniletanol,  polietilenqlikol vә qeyri-ion sәthi aktiv maddәlәrin istehsalında tәtbiq edilir.
E. yanardır, partlayış tәhlükәli vә zәhәrlidir. Ümumi zәhәrli tәsir göstәrir, dәrini vә selikli qişanı qıcıqlandırır.