ETİLSELLÜLÓZ – sellülozun sadә etil efiri. Ümumi formulu: [C₆H₇O₂ (OH)_3–x (OC₂H₅)_x]_n. İysiz ağ tozdur; mol. k. 24 –70 min, sıxlığı 1,09 –1,17 q/sm³. E.-un fiziki-mexaniki xassәlәr kompleksi bir elementar manqada әvәz olunmuş OH qruplarının sayı (x) vә ya әvәzolunma dәrәcәsi (ƏD) ilә müәyyәn edilir. Hәmçinin hәllolması әvәzolunma dәrәcәsi ilә tәyin edilir vә ƏD > 2,4 olduqda әksәr üzvi hәlledicilәrdә (benzol, toluol, etilasetat, butanol vә s.) hәll olur, suda vә neft mәhsullarında (mәs., benzin, heksan) hәll olmur. Qatı qәlәvi mәhlulların vә duru mineral turşuların tәsirinә davamlıdır. Turşuların qatı mәhlullarında E. bir neçә sut әrzindә depolimerlәşir. Plastifikator vә qatranların çoxu ilә uyğunlaşır; yaxşı dielektrikdir; E.-un nazik plyonkalarının yüksәk elektrik möhkәmliyi (150 –250 kV/mm) onun әn әhәmiyyәtli xassәsidir. Sәnayedә E.-u, әsasәn, qәlәvili sellülozun etilxloridlә qarşılıqlı tәsirindәn alırlar. E. efirsellüloz plastiklәrin, etrolların, plyonkaların, lakların istehsalında ilkin mәhsul kimi, antikorroziya örtüklәrin hazırlanmasında istifadә olunur.