DÖRDÜNCÜ DÖVR GEOLOGİYASI – geologiyanın Yerin Dördüncü dövrünü (sistemini) öyrәnәn bölmәsi. D.d.g.-na ayrıca bir fәnn kimi baxılması onun xüsusiyyәtlәri (davamiyyәti – 2,6 mln. il, insanın meydana gәlmәsi, örtük buzlaqların inkişafı vә s.), tәdqiqat üsulları (radiokarbon, lentvarı gillәrin tәdqiqi üsulu, palinoloji üsul vә s.) vә hәll edilәn elmi problemlәr (iqlim-stratiqrafik bölgülәrә әsaslanan dәqiq stratiqrafik sxemlәrin yaradılması vә Pleystosendә buzlaşma vә transqressiyaların tarixi, insanın inkişaf tarixi vә s.) ilә әlaqәdardır. Bu dövr indiyәdәk davam etdiyindәn o, Yerin müasir simasını vә onun üzәrindә mәskunlaşmış üzvi alәmi öyrәnәn elmlәrlә (geomorfologiya, iqlimşünaslıq, torpaqşünaslıq, biologiya, antropologiya, arxeologiya, mühәndisi geologiya vә s.) tәmasda öyrәnilir.

Dördüncü dövr çöküntülәri bir sıra spesifik әlamәtlәri (hәm quruda, hәm dә dәnizdә yayılması, materiklәrdә kontinental çöküntülәrin üstünlüyü, nisbәtәn az qalınlığı, yumşaqlığı vә sakit yatımı) ilә xarakterizә olunur. Bu dövrün çöküntülәri faydalı qazıntılarla zәngindir. Bax Dördüncü sistem (dövr) mәqalәsinә.

D.d.g.-nın tәmәli 19 әsrin 2-ci yarısı –20 әsrin 1-ci yarısında qoyulmuşdur (A.Penk, E.Brikner, P.Voldştedt, R.Flint, F.Seyner, P.A.Kropotkin, A.P.Pavlov, V.A.Obruçev vә s.). 1932 ildә Dördüncü Dövrün Öyrәnilmәsi üzrә Beynәlxalq Assosiasiya (INQUA) yaradılmışdır.