DÖVLӘT SİFARİŞİ – mәhsulun istehsalı vә çatdırılmasına, işlәrin görülmәsinә vә xidmәt göstәrilmәsinә dair dövlәt adından verilәn tapşırıq; hökumәtin tәsdiq etdiyi proqramlarına uyğun vә dövlәt büdcәsi vәsaitindәn maliyyәlәşdirilir. D.s. tәsәrrüfat fәaliyyәtinin bütün sferalarında әn mühüm dövlәt tәlәbatlarının ödәnilmәsini tәmin edir, sәnaye istehsalı sahәsindә zәruri ümumdövlәt tapşırıqlarının, tәdqiqatlar vә işlәmәlәr sahәsindә, elmi-texniki proqramların, ictimai-sosial sferada vә ölkәnin müdafiә qabiliyyәtinin güclәndirilmәsi yönündә işlәrin yerinә yetirilmәsinә zәmanәt verir. D.s. tәsәrrüfat әlaqәlәrinin birbaşa tәnzimlәnmәsi formasıdır.

Mәrkәzlәşdirilmiş şәkildә planlaşdırılan iqtisadiyyatda D.s. yuxarı orqan tәrәfindәn müәssisәyә (birliyә) verilәn vә icbari olaraq onun istehsal planına salınan tapşırıqdı; zәmanәtli material-texniki tәminata malikdir. İnkişaf etmiş bazar iqtisadiyyatı ölkәlәrindә D.s., bu vә ya digәr mәhsulun istehsalı üzrә dövlәt nümayәndәlәri ilә müәssisәlәr arasında müsabiqә әsasında bağlanmış müqavilәdir.

D.s.-nin icraçıları kimi hәm dövlәt müәssisәlәri, hәm dә digәr mülkiyyәt formalarına (özәl, sәhmdar) malik tәsәrrüfat subyektlәri çıxış edir. D.s.-ndә davamlı maliyyәlәşmә nәzәrdә tutulduğundan icraçı üçün sәrfәli olur. Bu sәbәbdәn D.s. bir çox halda lobbiçilik, hәmçinin potensial icraçılar arasında sәrt rәqabәt predmetinә çevrilir.