EXOKARDİOQRÁFİYA (exo + kardioqrafiya), u l t r a s ә s l ә   k a r d i o q r a f i y a – impulslu ultrasәsin kömәyilә ürәyin müayinә üsulu. Ürәyin müxtәlif sıxlıqlı strukturları sәrhәdindә әks olunan ultrasәs dalğalarının qeyd edilmәsinә әsaslanır. Normal şәraitdә aortanın vә sol qulaqcığın divarlarından, mitral qapağın ön vә arxa laylarından, mәdәciklәrarası arakәsmәdәn, sol mәdәciyin arxa divarından әks olunan әyrilәr ardıcıl yazılır. E. qazanılmış vә bәzi anadangәlmә ürәk qüsurlarının (dәliklәrin daralma dәrәcәsi vә qapaq laylarının vәziyyәti, ürәk arakәsmәlәrindә qüsurların, iri damarların әks tәrәfә yerdәyişmәsi, hәr hansı hissәnin hipoplaziyasının vә s. tәyin edilmәsi mümkündür), ekssudativ perikarditlәrin, ürәk şişlәrinin vә s. diaqnostikasında istifadә olunur. E.-nın kömәyilә ürәyin sol mәdәciyinin hәcmi, onun divarlarının qalınlığı vә әzәlә qatının kütlәsi, vurğu hәcmi vә bәzi digәr qan dövranı göstәricilәri tәyin edilir. E. vә skanerlәmә (u l t r a s ә s l ә  s k a n e r l ә m ә) üsullarının әlaqәlәndirilmәsi sistola vә diastola zamanı ürәk strukturunun dinamikasını әks etdirәn ardıcıl  tәsvirlәrin alınmasına imkan verir.