ƏFƏNDİZADƏ  Azad  Əli  oğlu  (20.3. 1907, Şamaxı – 12.8.1998, Bakı) – energetika sahәsindә Azәrb. alimi. Azәrb. SSR EA-nın akad. (1969; m. üzvü 1955). 1931 ildә Leninqrad Politexnik İn-tunu bitirmişdir. 1941–44 illәrdә Azәrb. SSR EA Kirovabad (indiki Gәncә) Elmi Tәdqiqat Bazasında direktor, 1952–60 illәrdә İ.Yesman ad. Elmi Tәdqiqat   Energetika İn-tunun direktor müavini vә direktoru, 1960 ildәn hәmin in-tun idarәolunan elektrik intiqalları laboratoriyasının rәhbәri olmuşdur. Tәdqiqatları avtomatik idarәolunan elektrik intiqallarının ümumi nәzәriyyәsinә vә asinxron mühәrriklәrin tezlik vasitәsilә tәnzimlәnmәsinә aiddir. Azәrb. dilindә texniki terminologiya sahәsindә dә fәaliyyәt göstәrmişdir. O, avtomatik idarәetmә üzrә SSRİ milli komitәsinin Azәrb. yerli şöbәsinin sәdri olmuşdur. Avtomatik İdarәetmә üzrә Ümumdünya Federasiyasının 1-ci (Moskva, 1960), 3-cü (London, 1966), 4-cü (Varşava, 1969), 5-ci (Paris, 1972), 6-cı (Boston, 1975), 7-ci (Helsinki, 1978) konqreslәrindә mәruzә etmişdir. Yüksәkixtisaslı kadrlar hazırlanmasında xidmәti var. Bir çox ixtiranın müәllifidir. ASE Baş redaksiyasının üzvü olmuşdur (1976). Qırmızı Əmәk Bayrağı ordeni ilә tәltif edilmişdir.

Əsәrlәri: Elektrik intiqallarının avtomatik idarә edilmәsi. B., 1964; Регулируемый электропривод для бурения нефтяных скважин. Б., 1961; Частотное управление электробуром. Б., 1969.