ELEKTRİK YÜKÜNÜN SAXLANMASI QANUNU – tәbiәtin fundamental qanunlarından biri; istәnilәn qapalı sistemin (elektrikdәn izolәedilmiş) elektrik yüklәrinin cәbri cәmi bu sistemin daxilindә hansı hadisәnin baş vermәsindәn asılı olmayaraq sabit qalır. 18 әsrdә müәyyәn edilmişdir. Elektronun (mәnfi yükün daşıyıcısı) vә protonun (qiymәtcә elektronun yükünә bәrabәr müsbәt yükün daşıyıcısı) kәşfi göstәrdi ki, elektrik yüklәri öz-özünә mövcud deyil, zәrrәciklәrlә bağlıdır (yük zәrrәciyin daxili xassәsidir). Sonralar qiymәtcә elektronun yükünә bәrabәr müsbәt vә mәnfi yükdaşıyan digәr elementar zәrrәciklәr kәşf olundu. Belәliklә, elektrik yükü diskretdir: hәr hansı cismin yükü elementar elektrik yükünün tam misillәrinә bәrabәrdir.

Hәr bir zәrrәcik ona mәxsus olan müәyyәn elektrik yükü ilә xarakterizә olunduğuna görә zәrrәciklәrin qarşılıqlı çevrilmәsi baş vermәyәn fiziki hadisәlәr oblastında E.y.s.q.-na zәrrәciklәr sayının saxlanmasının nәticәsi kimi baxmaq olar. Mәs., makroskopik cisimlәrin elektriklәnmәsi zamanı yüklәnmiş zәrrәciklәrin sayı dәyişmir, yalnız onların fәzada yerdәyişmәsi baş verir: yüklü zәrrәciklәr bir cisimdәn digәrinә ötürülür.

Zәrrәciklәrin qarşılıqlı çevrilmәsi pro- seslәrinin baş verdiyi elementar zәrrәciklәr fizikasında zәrrәciklәrin sayı saxlanmır: bir qisim zәrrәcik itir, başqaları yaranır, lakin bu zaman E.y.s.q. hәmişә ciddi ödәnir: zәrrәciklәrin bütün qarşılıqlı tәsirlәri vә çevrilmәlәri zamanı yüklәrin cәbri cәmi sabit qalır. Bu halda bütün belә çevrilmәlәrdә digәr saxlanma qanunları (enerjinin, hәrәkәt miqdarının vә s.) da ödәnmәlidir.

E.y.s.q. enerjinin saxlanması qanunu ilә birlikdә elektronun dayanıqlığını “izah edir”. Elektron (vә pozitron) yüklü zәrrәciklәrin әn kiçiyidir, ona görә dә heç cür parçalana bilmәz.