ELEKTROKAPİLYAR HADİSӘLӘR – elektrod–elektrolitin tәmas sәrhәdindә sәthi gәrilmәnin elektrodun potensialından asılılığı ilә bağlı fiziki hadisә. E.h.-nin sәbәbi metalın sәthindә ε sәthi yükü әmәlә gәtirәn vә xarici e.h.q. olmadıqda ikiqat elektrik tәbәqәsinin meydana çıxması ilә şәrtlәnәn ionların mövcudluğudur. Eyniadlı yüklü ionların fazalar ayrıcının sәthi boyunca qarşılıqlı itәlәnmәsi birlәşmiş molekulyar qüvvәlәri kompensasiya edir vә bunun nәticәsindә σ sәthi gәrilmәsi yüklәnmәmiş sәth halındakına nәzәrәn kiçik olur. Xaricdәn işarәsi ε-nun işarәsinә әks olan yüklü zәrrәciklәrin daxil edilmәsi onun qiymәtini kiçildir vә σ böyüyür. Birlәşmiş qüvvәlәrin elektrostatik qüvvәlәrlә tam kompensasiyası zamanı σ maks.-a çatır. Yüklәrin sonrakı daxil edilmәsi yeni sәthi yükün yaranması vә artması sәbәbindәn σ-nın azalması ilә nәticәlәnir. Sabit tәrkibli mәhlulda σ-nın elektrodun φ potensialından asılılığının eksperimental әyrisi Lipman tәnliyi ilә tәsvir olunur: ε= – dσ/dφ. Bu tәnlik ε-nun qiymәtini vә ikiqat elektrik tәbәqәsinin tutumunu hesablamağa imkan verir.

E.h.-ә ionların, xüsusilә dә sәthiaktiv maddәlәrin ionlarının spesifik adsorbsiyasının tәsir göstәrmәsi nәticәsindә onların sәthinin aktivliyini tәyin etmәyә imkan yaranır. E.h.-dәn әrinmiş metallarda (alüminium, qallium, kadmium, sink vә s.) onların adsorbsiya xüsusiyyәtlәrini tәyin
etmәk üçün istifadә edirlәr. Polyaroqrafiyada maks.-ları tәyin etmәk üçün E.h. nәzәriyyәsi tәtbiq olunur.