EMPEDÓKL (qәdim yun. Ἐμπεδοκλῆς) (e.ә. 490–430) – qәdim yunan filosofu, hәkim vә siyasi xadim; quldarlıq demokratiyasının ideoloqu. E. “Tәbiәt haqqında” fәlsәfi poemasında dörd ilkin maddәni (torpaq, su, hava, od) materiyanın elementlәri (mövcud olan hәr şeyin “köklәri”) hesab edirdi. E.-a görә, şeylәrin yaranması hәmin elementlәrin birlәşmәsi, mәhvi isә şeylәrin ilkin elementlәrә parçalanmasıdır. Alәmin müxtәlifliyi hәr şeyin birlәşmәsi vә mәhv olması prosesidir. E.-un fikrincә, alәmdә hәmçinin iki maddi hәrәkәtverici qüvvә mövcuddur: mәhәbbәt (cәzbetmә qüvvәsi) vә düşmәnçilik (dәfetmә qüvvәsi). Mürәkkәb cisimlәrin sadә elementlәrdәn әmәlә gәlmәsi haqqında fikri E. irәli sürmüşdür.

Günәş tutulmasını E. Ayın Yerlә Günәşin arasında olması ilә izah etmiş, işığın fәzada yayılması üçün vaxt tәlәb olunduğunu göstәrmişdir. Tәbiәtşünaslığa dair fikirlәri var. Antik dövrün tәkamülçüsü olan E.-a görә, bitkilәr heyvanlardan әvvәl yaranmışdır, heyvanlar bir neçә inkişaf
mәrhәlәsi keçirmiş, yaşamağa daha çox qabil olan növlәri qalmışdır; insan isә çox uzun tәkamül (inkişaf) yolu keçmişdir.