ƏLƏSGƏROV Süleyman Əyyub oğlu (22.2.1924, Şuşa – 22.1.2000, Bakı) – Azәrb. bәstәkarı, dirijor, pedaqoq. Azәrb. SSR xalq artisti (1974). Azәrb. Dövlәt Konservatoriyasını bitirmişdir (1948, B.İ.Zeyd manın sinfini). 1949– 65 illәrdә Azәrb. Dövlәt Musiqi Texnikumunun direktoru, Azәrb. SSR Mәdәniyyәt Nazirliyi incәsәnәt şöbәsinin müdiri, Azәrb. Dövlәt Radio vә Televiziyasının xalq çalğı alәtlәri ork.-nin dirijoru, Azәrb. Dövlәt Musiqili Komediya Teatrının direktoru vә baş dirijoru olmuşdur. Musiqinin müxtәlif janrlarında әsәrlәr yaratmış Ə.-un yaradıcılığında operetta әsas yer tutur: “Ulduz” (1948; 1964 ildә “Azәrbaycanfilm” kinostudiyasında ekranlaşdırılmışdır), “Özümüz bilәrik” (1962), “Olmadı elә, oldu belә” (1964; yeni redaksiyası, 1983), “Milyonçunun dilәnçi oğlu” (1966; Ü.Hacıbәyov ad. Resp. mükafatı laureatı, 1967), “Hardasan, ay subaylıq” (1968), “Sevindik qız axtarır” (1970), “Hәmşәxanım” (1971) vә s. “Ulduz” operettası SSRİ-nin bir çox şәhәrindә, Bolqarıstanda tamaşaya qoyulmuşdur. Ə. “Bahadır vә Sona” (1961, N.Nәrimanovun eyniadlı povesti әsasında), “Solğun çiçәklәr” (1966, C.Cabbarlının eyniadlı pyesi әsasında) operalarının, 5 kantata, 2 simfoniya, “Bayatı-Şiraz” simfonik muğamının (1950), “Qarabağ” rapsodiyasının (1990), simfonik poema vә süitaların, o cümlәdәn Nizaminin 850 illiyinә hәsr olunmuş solist, xor vә simfonik ork. üçün poemanın (1991), kamera-vokal vә instrumental әsәrlәrin, bir çox mahnıların müәllifidir. Ə.-un Azәrb. xalq çalğı alәtlәri ork. üçün yazdığı “Cәngi”, “Lirik pyeslәr”, “Sözsüz mahnı”lar, tar ilә ork. üçün 2 konsert (1973, 1982), saz, müğәnni vә ork. üçün “Aşıqsayağı” süitası (1984) geniş şöhrәt qazanmışdır. Ə.-un Azәrb. xalq musiqi intonasiyaları ilә sıx bağlı olan әsәrlәri üçün musiqi dilinin sadәliyi, sәlisliyi, forma aydınlığı sәciyyәvidir. 1950– 99 illәrdә Azәrb. Dövlәt Konservatoriyasında dәrs demişdir (1971 ildәn Azәrb. xalq musiqisi kafedrasının müdiri, 1977 ildәn prof.-u). “Azәrbaycan xalq çalğı alәtlәri üzrә orkestrlәşdirmә” (1991, S.Abdullayeva ilә birgә) kitabının müәllifidir. Azәrb. Resp.-nın “Şöhrәt” ordeni ilә tәltif edilmişdir.
