ƏLİYEV Mәstan Astan oğlu (1918, indiki Tovuz r-nunun Əsrik Cırdaxan k. – 16. 4.1945, Almaniya, Tegel ş.) – Sovet İttifaqı Qәhrәmanı (ölümündәn sonra, 31.5.1945), starşina. 1939 ildәn orduda xidmәt etmişdir. Böyük Vәtәn müharibәsindә 1-ci Belorusiya cәbhәsinin tәrkibindә Ukraynanın vә Polşanın düşmәndәn azad olunmasında igidlik göstәrmişdir. Oder çayı uğrundakı vuruşmalarda Ə.-in başçılıq etdiyi vzvod sahilә çıxmış vә düşmәni çaydan uzaqlaşdırmışdır. Ə. Berlin istiqamәtindә, Tegel ş.-ndә gedәn döyüşlәrdә hәlak olmuşdur. Qırmızı Ulduz, 1-ci dәrәcәli Vәtәn müharibәsi, Şöhrәt ordenlәri vә medallarla tәltif edilmişdir.