ƏLİYEV Müseyib Hәşim oğlu (10.12. 1923, Gәdәbәy r-nunun Böyük Qarabulaq k. – 1.2012, Bakı) – Azәrb. fizioloqu, baytar hәkim. Biologiya e.d. (1963), prof. (1969). Moskva Baytarlıq Akademiyasını bitirmişdir (1949). 1953 ildә Azәrb. SSR EA-nın Zoologiya İn-tunun fiziologiya laboratoriyasında, 1956 ildәn fiziologiya bölmәsindә, 1958–95 illәrdә hәmin in-tda laboratoriya müdiri, baş elmi işçi işlәmişdir. Tәdqiqatları camışın laktasiya fiziologiyasının, növ xüsusiyyәtlәrinin öyrәnilmәsinә, camışın maşınla sağılmasının elmi әsaslarının hazırlanmasına vә s. aiddir. Ə. hipoqalaktiyanın neyroendokrin patogenetik mexanizmlәrini aşkar etmiş, real profilaktik vә yüksәkeffektiv müalicә üsullarını elmi cәhәtdәn әsaslandırmış vә tәtbiq etmişdir. Ə. südәmәr körpәlәrin ana südü ilә deyil, südәvәzlәyicilәrlә bәslәnmәsinin gәlәcәk nәslin sağlamlığına göstәrdiyi mәnfi tәsirin patogenetik tәhlili ilә mәşğul olmuşdur. 292 elmi әsәrin, o cümlәdәn bir neçә monoqrafiyanın müәllifidir. Elmi kadrların hazırlanmasında xidmәti olmuşdur.

Ə s ә r l ә r i: Физиология лактации буйволиц. Б., 1964; Физиология и патология тимуса (T.Q. Qurbanovla birlikdә). Б., 1983; Новая веха в изучении физиологии лактации человека и животных (Ş.A.Rәhimova vә Y.B.İsmayılovla birlikdә). Б., 1990.