ƏLİYEVA Mәdinә Vaqif qızı (d.4.5.1965, Bakı) – Azәrb. balet artisti, xoreoqraf, baletmeyster. Azәrb. Resp. xalq artisti (2002). Bakı Xoreoqrafiya Mәktәbini bitirmişdir (1983). Moskva Xoreoqrafiya Mәktәbindә tәcrübә keçmişdir (1985–86). 1983 ildәn Azәrb. Opera vә Balet Teatrının solisti, aparıcı balerinası vә balet truppasının rәhbәridir. Partiyaları: Paxita, Kitri (“Paxita”, “Don Kixot”, L.Minkus), Ayişә (“Yeddi gözәl”, Q.Qarayev), Maşa (“Şelkunçik”, P.İ.Çaykovski), Şәhrizad (“Min bir gecә”, F.Əmirov), Gülyanaq (“Qız qalası”, Ə.Bәdәlbәyli) vә b. Balet artistlәrinin 1-ci Zaqafqaziya müsabiqәsinin (1987, Bakı) laureatıdır. 2012 ildә Azәrbaycan Dövlәt Akademik Opera vә Balet Teatrında V.A.Motsartın “Hamı belә edir”, S.V.Raxmaninovun “Aleko”, Ü.Hacıbәylinin “Əsli vә Kәrәm” operalarındakı rәqslәrә quruluş vermişdir. F.Əmirovun 2014 ildә Minsk ş.-ndә sәhnәyә qoyulmuş “Min bir gecә” baletinin quruluşçu balet meysteri olmuşdur.