ƏLVANQANADLILAR, әlvan qanad milçәklәr (Tephritidae vә ya Tidae) – dәyirmitikişli qısabığcıqlılar fәsilәsi. Uz. 3–9 mm-dir. Əksәriyyәtinin qanadları әlvandır. Qonur zolaqlı, xallı, xırda milçәklәrdir. Geniş yayılmış 4000 növü mәlumdur. Azәrb.-da yaşayan 3 növü: albalı milçәyi (Rhagoletis cerasi), qovun milçәyi (Myiopardalis pardalina) vә itburnu milçәyi (Carpomiya schineri) ciddi ziyanvericilәrdir. Ə.-ın sürfәlәri, әsasәn, bitkiyeyәn olub, mürәkkәbçiçәklilәr vә dodaqçiçәklilәrlә qidalanır. Adәtәn, torpağın sәthindә, yaxud yem bitkilәrinin çiçәklәrindә puplaşır. Ə.-ın çoxu polifaqdır. Mәs., Aralıq dәnizi meyvә milçәyi (Ceratitis capitata) üçün 200-ә yaxın yem bitkisi, digәr Ə. üçün oliqofagiya sәciyyәvidir. Pupu, sürfәsi, yaxud milçәyi qışlayır. Bir sıra Ə. (zeytun, saflor, albalı milçәklәri) meyvә, tәrәvәz vә bağça bitkilәrini zәdәlәyir.

Albalı milçәyi (Rhagoletis cerasi)