ƏMƏK HÜQUQU – 1) bir sıra dövlәtlәrdә insanın (vә ya ancaq vәtәndaşın) әsas iqtisadi konstitusiya hüquqlarından biri. Bәzi ölkәlәrdә (mәs., İtaliya, Bolqarıstan) Ə.h. dürüst hüquqi mәzmuna malik deyil vә dövlәtin yalnız işlәmәk arzusunda olanlar üçün müvafiq şәrait yaratmaq vәzifәsi kimi ifadә olunur. Bu hüquq Azәrb. Resp.-nın Konstitusiyasında fәrdi vә ictimai ruhun әsası kimi tәsbit edilmişdir; 2) işçilәrin әmәk münasibәtlәrini, habelә әmәk münasibәtlәri ilә әlaqәdar digәr mәsәlәlәri tәnzimlәyәn hüquq normaları mәcmusu. Ə.h. mülkiyyәtin vә tәsәrrüfatçılığın formalarından asılı olmayaraq, işçilәrlә işәgötürәn arasındakı muzdlu әmәk münasibәtlәrinin tәnzimlәnmәsindә mühüm rol oynayır. Əmәk qanunvericiliyinә uyğun olaraq, bu münasibәtlәr müәssisәlәrdә işçilәrin әmәyinin tәşkilinә dair әmәlә gәlәn sosial münasibәtlәri özündә әks etdirir. İşçilәrin işәgirmә, başqa işә keçmә vә işdәn azadolma qaydaları mәhz Ə.h. ilә müәyyәn edilir. Bundan әlavә, Ə.h. әmәkhaqqı, iş vaxtı, istirahәt vaxtı, әmәk intizamı, hәvәslәndirmә tәdbirlәri, intizam mәsuliyyәti, әmәk mübahisәlәri vә onların hәlli qaydası kimi zәruri mәsәlәlәri nizamlayır. Hәr bir vәtәndaş әmәk müqavilәsini bağladığı andan әmәk hüququ münasibәtlәrinә daxil olur.

Azәrb. Resp.-nın Ə.h. әmәk qanunvericiliyi sisteminә daxil olan Əmәk Mәcәllәsindәn, Azәrb. Resp.-nın müvafiq qanunlarından, müvafiq icra hakimiyyәti orqanlarının sәlahiyyәti çәrçivәsindә qәbul etdiklәri normativ-hüquqi aktlardan, әmәk vә sosial-iqtisadi mәsәlәlәrlә әlaqәdar Azәrb. Resp.-nın bağladığı, yaxud tәrәfdar çıxdığı beynәlxalq müqavilәlәrdәn ibarәtdir.