ƏRƏFƏ GÜNÜ  – islamda әlamәtdar günlәrdәn biri; Qurban bayramından bir gün әvvәl, Zilhiccә ayının (hicri-qәmәri tәqviminin 12-ci ayı) 9-cu günü. Konkret olaraq müsәlman bayramı sayılmasa da, bayram kimi qeyd olunur. Hәcc ziyarәtini yerinә yetirmiş zәvvarlar hәmin gün Mәkkәdәn çıxaraq Ərәfata yollanır, günorta namazından gün batanadәk orada qalır, dualar edirlәr. Ə.g. ayini özünütanıma vә Allahı dәrketmә yolunda çox mühüm vә tәsirli vasitәlәrdәn biri kimi dәyәrlәndirilir. Bu ayin yerinә yetirilmәdәn Hәcc ziyarәti mәqbul sayılmır. Ə.g. oruc tutmağın xüsusi üstünlüyü var. Mәhәmmәd peyğәmbәr sonuncu xütbәsini (“Vida xütbәsi”) Ə.g. söylәmişdir.