ƏRƏFSƏ – Azәrb. Resp. Culfa r-nunda (Nax. MR) kәnd. Ərәfsә ә.d.-nin mәrkәzi. R-n mәrkәzindәn vә Culfa d.y. st.-ndan 55 km şm.-da, Əlincәçayın sağ sahilindә, Zәngәzur silsilәsinin yamacındadır. Əh. 991 (2011); arıçılıq vә heyvandarlıqla mәşğuldur. Tam orta mәktәb, mәdәniyyәt evi, kitabxana, ambulatoriya, baytarlıq mәntәqәsi, rabitә şöbәsi var.

1926 ildә Ə.K.Əlәkbәrovun apardığı arxeoloji tәdqiqat zamanı e.ә. 2-ci minilliyә aid monoxrom boyalı gil qab nümunәlәri aşkar edilmişdir. 1974 ildә V.Əliyev Ə.-dә yaşayış yeri olduğunu müәyyәnlәşdirmişdir. Buradan obsidian (d ә v ә g ö z ü), monoxrom boyalı vә cilalı qara gil qab qırıqları, daşdan әmәk alәtlәri (dәn daşları, sürtgәclәr, hәvәng vә dәstәlәr) vә s. tapılmışdır. Ə.-dәn şm.-ş.-dә Tunc dövrünә aid qәbir abidәlәri var. Ə.-nin c.-undakı qәbiristan orta әsrlәrә aiddir. Kәnddәn şm.ş.-dә orta әsrlәrә aid tağvarı formada inşa edilmiş Daş körpü vә Xarabalıq yaşayış yeri mövcuddur.