ƏSƏDOV Mәhәmmәd Nәbi oğlu (5.12. 1941, Zәngilan r-nunun Baharlı k. – 20.11. 1991, Xocavәnd r-nunun Qarakәnd k.) – Azәrb. dövlәt vә hәrbi xadimi, gen.-m. (1990). Azәrb. Dövlәt Xalq Tәsәrrüfatı İn-tunu bitirmişdir (1970). Sumqayıt plan şöbәsinin müdiri (1967–68), Sumqayıt Şәhәr Partiya Komitәsi sәnaye şöbәsinin tәlimatçısı (1968–73), şöbә müdiri (1973–75), tәşkilat şöbәsinin müdiri (1975–78) olmuşdur. 1978 ildә Ağsu Rayon İcraiyyә Komitәsinin sәdri vәzifәsinә seçilmişdir. 1980– 82 illәrdә Moskvada Tәhlükәsizlik Akademiyasında tәhsil almışdır. Azәrbaycan Tәhlükәsizlik Nazirliyindә çalışmış (1982–83), sonra isә Beylәqan Rayon Partiya Komitәsinin birinci katibi (1983–86), AKP MK-nın inzibati orqanlar şöbәsinin müdiri (1986–88), Ağdaş Rayon Partiya Komitәsinin birinci katibi (1988–89), Quba Rayon Partiya Komitәsinin birinci katibi (1989–90) olmuşdur. 1990 ilin may ayında Azәrb. Resp.-nın daxili işlәr naziri vәzifәsini tutan Ə. tez bir zamanda xüsusi tәyinatlı milis dәstәsi yaratmış, Xocalı hava limanında ermәnilәrin gediş-gәlişinә nәzarәti güclәndirmәk üçün DİN qüvvәlәrini sәfәrbәr etmişdir. 1991 ilin noyabrında Ə. dövlәt müşaviri tәyin olunmuşdur. Çaykәnd, Qarabulaq, Todan, Erkәc, Sınıqkilsә vә s. kәndlәrin ermәnilәrdәn tәmizlәnmәsi әmәliyyatlarında şәxsәn iştirak etmişdir. Noyabrın 20-dә Xocavәnd r-nu yaxınlığında digәr dövlәt xadimlәri ilә birgә içindә olduğu Mi-8 helikopterinin ermәni hәrbi birlәşmәlәri tәrәfindәn vurulması nәticәsindә şәhid olmuşdur. Bakıda Fәxri Xiyabanda dәfn edilmişdir. Bir neçә tәhsil müәssisәsi, gәmi, küçә, xiyaban vә s. onun adını daşıyır.