“FATİHƏ” (әr. الفاتحة) – Quranın   ilk surәsi. Nazilolma ardıcıllığına görә 5-ci surәdir, 7 ayәdәn ibarәtdir. Tam adı “Fatihәtül-kitab”dır (“Kitabı  açan”). “Hәmd” (“Tәrif”), “Ümmül-quran” (“Quranın anası”), “Sәbül-mәsani” (“Yeddi tәkrarlanan”) vә s. adları da var. “F.”-nin birinci hissәsi Allahın tәrifini, ikinci hissәsi isә insanın bütün varlığı ilә Allaha yönәlәrәk ondan “doğru yol” istәmәsini ifadә edir. Müsәlmanlar üçün xüsusi әhәmiyyәtә malik olan “F.” bütün namazlarda, doğum, nikah vә dәfn mәrasimlәrindә, ümumiyyәtlә isә dua, yaxud şәfa niyyәtilә gündәlik oxunur. Daxilindәki söz vә hәrflәrin dәqiq sayı vә ardıcıllığı, ayәlәrindә istifadә olunmuş vә olunmamış hәrflәrin riyazi nisbәti, elәcә dә ilahi gücünә inanılan 7 rәqәmi vә digәr surәlәrdәn fәrqli olaraq Mәhәmmәd peyğәmbәrә iki dәfә nazil olmaqla, 14 әdәdi әmәlә gәtirmәsi baxımından “F.” müsәlman mistik tәlimlәrindә, xüsusәn hürufilikdә özünәmәxsus yer tutmuş, sufi әdәbiyyatının vә Şәrq poeziyasının başlıca ilham mәnbәyinә çevrilmişdir. Quranın tam tәfsirindәn başqa “F.”-yә bir sıra müstәqil tәfsirlәr dә yazılmışdır (Fәxrәddin Razi, Molla Fәnari, Dәvvani,  Cәzayiri vә b.).