FEDÓTOV Pavel Andreyeviç (4.7.1815, Moskva – 26.11.1852, Peterburq) – rus boyakarı vә qrafiki, rus tәsviri sәnәtindә tәnqidi realizmin banisi. Zabit olarkәn vә istefaya çıxdıqdan (1844) sonra Peterburq Rәssamlıq Akademiyasında tәhsil almışdır (1834– 45). Yaradıcılığının erkәn dövründә (1840-cı illәrin ortalarınadәk) karandaş rәsmlәri, karikaturalar, akvarellә işlәnmiş batal sәhnәlәri, portret vә kompozisiyalar, yetkin dövründә (1840-cı illәrin sonunadәk) isә, әsasәn, yağlı boyalarla, tablolar seriyası çәkmişdir (“Tәravәtlәnmiş kavaler”, 1846; “Xaç suyuna salma”, 1847; “Tәlәbkar әrlik qız”, 1847; “Mayorun elçiliyi”,1848; hamısı Tretyakov qalereyasındadır, Moskva). F.-un kiçik hәcmli boyakarlıq portretlәri üçün bәdii tamlıq sәciyyәvidir (“Y.Q.Fluq”, tәqr. 1850; “N.P.Jdanoviç”, 1849; hәr iki әsәr Rus muzeyindәdir, S.-Peterburq). Yaradıcılığının son dövründә (1850–52) faciәvilik vә ümidsizlik hisslәri ilә aşılanmış obrazlar yaratmışdır (“Cavan dul qadın”, “Ankor, yenә dә ankor!”; hәr iki әsәr Tretyakov qalereyasındadır).

 Fedotov P.A. "Cavan dul qadın". 1852. Tretyakov qalereyası.