FEİL (ər. –  فعل iş, hərəkət) – əşyanın iş, hərəkət və halını bildirən əsas nitq hissəsi. F.-in quruluşca 3 növü var: sadə, düzəltmə, mürəkkəb. F.-lər təsriflənən (şəxsə və kəmiyyətə görə dəyişən feillər) və təsriflənməyən (məsdər, feili sifət, feili bağlama) formalarına bölünür. Zaman (şühudi keçmiş, nəqli keçmiş, indiki, qəti-gələcək, qeyri-qəti gələcək), şəxs, növ (məlum, məchul, qayıdış, qarşılıqlı, müştərək, icbar), forma (təsriflənən, təsriflənməyən), şəkil (əmr, xəbər, lazım, arzu, vacib, şərt, davam), tərz, təsirlilik, inkar və s. kateqoriyaları var. F. cümlədə, əsasən, xəbər vəzifəsində çıxış edir. Azərb. dilində feillər həm leksik tərkibinin, həm də qrammatik kateqoriyalarının zənginliyi ilə seçilir.

Əd.: H ü s e y n z a d ə M. Müasir Azərbaycan dili. Morfologiya. B., 2007.