FEİLİ SİFƏT – feil və sifətin xüsusiyyətlərinə malik təsriflənməyən, şəxsiz feil forması. Əşyanın hərəkətlə bağlı əlamətini bildirməklə yanaşı, eyni zamanda həmin hərəkəti başqa bir cəhətdən müəyyən predmet, əşya və ya subyekt ilə əlaqələndirmiş olur. F.s.-in feilə məxsus xüsusiyyətləri: feil kimi hərəkət, hal-vəziyyət anlayışını, təsdiq və inkarı, müəyyən dərəcədə zaman, bəzən də şəkil anlayışını ifadə edir, təsirli və təsirsiz, feilin müvafiq növlərində olur, isimləri, eləcə də substantivləşmiş digər nitq hissələrini yönlük, təsirlik, yerlik və çıxışlıq hallarında ifadə edir. F.s.-in sifətə aid xüsusiyyətləri: sifət kimi aid olduğu ismin əvvəlində gəlir və onun əlamətini bildirir, necə? nə cür, hansı? suallarına cavab verir, çox halda cümlədə təyin kimi çıxış edir, aid olduğu sözə yanaşma əlaqəsi ilə bağlanır.

Əd.: H ü s e y n z a d ə M. Müasir Azərbaycan dili. Morfologiya. B., 2007.