FELLENBERQ Filipp Emanuel fon (15.6.1771, Bern – 21.11.1844, Bern yaxınlığında Hofvil) – İsveçrə pedaqoqu. Zadəgan ailəsində doğulmuşdur. Tübingen Un-tinin hüquq və fəlsəfə şöbəsində oxumuşdur. Yaxından tanış olduğu İ.H.Pestalotsinin F.-ə böyük təsiri olmuşdur. F. tərbiyənin əsas məqsədini bütün bəşəriyyətin maddi rifaha çatmasında və xoşbəxt həyatında görürdü. 1804 ildə öz malikanəsi Hofvildə yoxsul uşaqları üçün tərbiyə müəssisəsi təşkil etmişdir. Uşaqlar burada gündə 10 saatadək k.t. işləri ilə məşğul olur, təqribən 2 saat oxumağı, yazmağı, hesabı öyrənirdilər. F. daha sonra Hofvildə k.t. məktəbi, zadəgan uşaqları üçün pansion, müəllimlər seminariyası açmışdır. Hofvil məktəbləri Avropada böyük şöhrət qazanmışdı. F. öz məktəblərini İ. Pestalotsi məktəbləri ilə birləşdirməyə cəhd etmiş, lakin İ. Pestalotsi onun uşaq əməyindən 10 saat istifadə metodunu məqbul saymadığından bu, baş tutmamışdır. F.-in ölümündən sonra oğlu Vilhelmin rəhbərlik etdiyi məktəblər 1855 ilədək fəaliyyət göstərmişdir.