β-FENİLETİL SPİRTİ, 2-f e n i l e t a n o l – üzvi birlәşmә, C₆H₅CH₂CH₂OH; rәngsiz, zәrif qızılgül iyli әtirli maye; t_qayn. 220–222°C. Propilenqlikolda, 50%-li etanolda 1:2, suda 1:60 nisbәtlәrindә hәll olur. F.s. susuz KOH üzәrindә qovulduqda stirol (vәsfi reaksiya kimi istifadә edilir), oksidlәşdikdә fenilasetaldehid vә fenilsirkә turşusunun qarışığı әmәlә gәlir.

F.s. qızılgül (25–65%), mixәk, әtirşah vә digәr efir yağların tәrkibindә var; darçın turşusunun efiri şәklindә qatran vә balzamlarda tapılmışdır. 

Sәnayedә F.s. AlCl3 iştirakı ilә benzolun etilenoksidlә qarşılıqlı tәsirindәn vә ya stiroloksidin hidrogenlәşmәsindәn alınır. 

F.s. çoxlu sayda gül vә әtriyyat kompozisiyalarının hazırlanmasında, sabun vә kosmetik mәmulatlar, süni gül yağı, qida essensiyaları üçün әtirlәyici, hәmçinin әtirli maddәlәrin – fenilasetaldehid vә müxtәlif efirlәrin alınmasında xammal kimi istifadә edilir.