FERMİUM (lat. Fermium), Fm – kimyәvi element; dövri sistemin III qrupunda yerlәşәn süni radioaktiv kimyәvi element; aktinoidlәrә aiddir (at.n.100). Stabil izotopları yoxdur. Kütlә әdәdlәri 243–259 olan 17 izotopu mәlumdur; әn çox yaşayan nuklidi ²⁵⁷Fm-dir (T_1/2 100,5 sut, α–şüalandırıcıdır). F.-u ilk dәfә 1952 ildә A.Qiorso, S.Tompson vә Q.Hiqqins istilik-nüvә partlayışının mәhsullarından ayırmışlar.

Atomun ehtimal edilәn xarici elektron tәbәqәsinin konfiqurasiyası 5f¹²6s²6p⁶7s²; oksidlәşmә dәrәcәsi +2 vә +3 (daha davamlı); Fm³⁺ vә Fm²⁺-nin ion radiusları müvafiq olaraq 0,0922 nm vә 0,194 nm. F.-un kimyәvi xassәlәri bir çox cәhәtdәn üçvalentli aktinoidlәrinkinә oxşardır. F. HCl, HNO₃ vә NH₄CNS-in qatı mәhlullarında anion komplekslәri әmәlә gәtirir vә anionitlәrdә sorbsiya olunur. F.-u üçvalentli aktinoidlәrdәn ayırmaq üçün kationitlәrdә ion mübadilәsindәn vә ekstraksiya xromatoqrafiyası üsulundan istifadә olunur. F.-un izotopları tsiklotronda Th, U vә ya Pu-dan olan hәdәfi sürәtli Ne, O vә ya C ionları ilә nüvә reaktorunda Pu, Cm vә ya Cf izotoplarının qarışığını şüalandırmaqla alınır.