FERRİTLƏR – dәmir (III)-ün әsaslığı daha çox olan digәr metal oksidlәri ilә әmәlә gәtirdiyi mürәkkәb oksidlәr. Bәzәn kimyәvi tәbiәtindәn asılı olmayaraq bütün ferrimaqnetiklәr F. adlanır. Şpinel quruluşlu F.-in ümumi formulu M^IIFe₂O₄; burada M^II – Ni, Co, Mn, Mg, Cu, Fe, Zn, Cd. Onlar kub kristal qәfәsdә kristallaşır. Qranat quruluşlu F. kub kristal qәfәsdә kristallaşır vә ümumi formulu R₃Fe₅O₁₂; burada R – Sm-dәn Lu-a qәdәr nadir-torpaq elementlәr, hәmçinin Y-dur. Heksaferritlәr heksaqonal sinqoniyada kristallaşır; maqnetoplümbit (PbFe₁₂O₁₉) vә ya ona yaxın minerallara oxşardır. F.-in bir-neçә tipi, mәs., BaFe₁₂O₁₉, BaM₂Fe₁₆O₂₇, Ba₃M₂Fe₂₄O₄₁vә s. ayırd edilir. Strukturu dәyişmiş perovskit mineralın CaTiO₃ rombik quruluşlu F. qrupu ortoferritlәr adlanır. Yuxarıda qeyd edilәn bütün F. qrupları ferrimaqnetiklәr, ortoferritlәr isә antiferromaqnetiklәrdir; sonuncular yalnız çox aşağı temp-rlarda (bir neçә K dәrәcә vә aşağı) ferrimaqnetiklәrә çevrilir.

Adәtәn F. nisbәtәn yüksәk bәrkliyә vә әrimә temp-rlarına malik kristal maddәlәrdir. Onlar suda vә üzvi hәlledicilәrdә hәll olmur. Turşuların tәsirindәn parçalanır. Havada stabildir, lakin 1000°C vә daha yuxarı temp-rlarda dissosiasiya edә vә tәrkibindә olan Fe²⁺, Mn²⁺ ionları oksidlәşә bilir. Polikristallik F. keramikanın alınma texnologiyası ilә istehsal edilir. F. maqnit materialları kimi radiotexnika, elektronika, avtomatika vә hesablama texnikasında istifadә olunur.

Əd.: Л е м ю к  Л.М., Ж у р а в л ё в  Г.И. Химия и технология ферритов. Л., 1983.