FETTEL (Vettel) Sebastyan (d.3.7.1987, Heppenhaym) - Almaniya idmançısı. 2010-cu illərdə dünyanın ən güclü avtoyürüşçülərindən biridir. 8 yaşından kartinq yarışlarında iştirak etmişdir; gənclər arasında çempionatın (2001, Monako) qalibi olmuşdur. 2006 ildə “BMV Zauber” komandasının tərkibində test-pilot kimi ilk dəfə “Formula-1” dünya çempionatında çıxış etmişdir. 2008 ildən “Toro Rosso” İtaliya komandasının əsas pilotu olmuşdur. Başlıca uğurlarını B. Britaniyanın “RedBull Reysinq” komandasında çıxışları (2009-14) zamanı əldə etmişdir; ardıcıl olaraq 4 çempionatda (2010-13) qələbə qazanmış və “Formula-1” yarışları tarixində ən gənc dünya çempionu olmuşdur. M.Şumaxerin rekordunu üstələyən F. Qran-pri yarışlarında 9 ardıcıl qələbə qazanmış (2013) və elə həmin il Şumaxerin nailiyyətini təkrarlayaraq bir mövsümdə 13 Qran-prinin qalibi olmuşdur. Dünyanın güclü avto yürüşçülərinin iştirak etdiyi Beynəlxalq çempionlar yarışında (2015) birinci yerə çıxmışdır.
