FEYZULLAYEV Nijad Ağazәki oğlu (22.1.1932, Bakı – 20.7.2001, Bakı) – Azәrb. parazitoloqu. AMEA-nın müxbir üzvü (2001). Biologiya e.d. (1973), prof (1996). A.V.Feyzullayevin oğludur. 1955 ildә Azәrb. Dövlәt Un-tini bitirmişdir. Azәrb. SSR EA Zoologiya İn-tunda baş laborant (1965–74) olmuş, 1974 ildәn ömrünün sonunadәk helmintlәrin sistematika vә biologiyası laboratoriyasının müdiri işlәmişdir. Azәrb. Dövlәt Pedaqoji Un-tindә zoologiya kursunu tәdris etmişdir. F. yeni parazitoloji anlayış olan “mezoparazitizm” terminini elmә daxil etmişdir. O, helmintologiyada helmintlәrin taksonomiyasında sintetik sistematika prinsiplәrinin tәtbiqi ilә bağlı yeni elmi istiqamәt işlәyib hazırlamışdır.

Tәdqiqatları iki istiqamәtә: quş helmintlәrinin ekoloji-faunistik öyrәnilmәsi vә taksonomiya, mikro-makrotәkamül mәsәlәlәrinin fundamental tәdqiqi sahәsindә aparılmışdır. 8 trematod fәsilәsinin taksonomiyası, 7 növ trematodun hәyat tsiklinin, inkişafının ayrı-ayrı fazalarının morfologiyası vә biologiyası, 4 növ trematodun xromosom dәsti onun rәhbәrliyi ilә öyrәnilmişdir. F. nәzәri biologiya sahәsindә dә tәdqiqat aparmışdır. 140 elmi әsәrin, o cümlәdәn 2 monoqrafiyanın, “Azәrbaycanın heyvanlar alәmi” 3 cildliyinin әsas müәlliflәrindәndir.

Ə s ә r l ә r i: Qasımov H. B., Feyzullayev N. A. Heyvanlarda tәsadüf edilәn helmintozlar vә onlara qarşı mübarizә tәdbirlәri. B., 1964; Фейзуллаев Н. А. Трематоды подсемейства Suslosoeloidea (морфология, биология, филогения и систематика). Б., 1980.