FƏQİR (Hacı ağa Məhəmməd ağa oğlunun təxəllüsü; təqr. 1836, Ordubad - 1885, Ordubad) - Azərb. şairi. M.S. Ordubadinin atasıdır. Tacir ailəsində doğulmuşdur. Uşaqlıq və ilk gənclik illərini Təbriz və Şirazda yaşamışdır. Təhsilini Şirazın tanınmış alimlərindən almış, ərəb və fars dillərini mükəmməl öyrənmişdir. Ordubada qayıtdıqdan sonra bir müddət müəllimlik etmişdir. “ Əncüməni-şüəra” ədəbi məclisinin fəal üzvlərindən olmuş, 1860-70-ci illərdə ona rəhbərlik etmişdir. Klassik üslubda yazdığı əsərlərində [“Kürdün çul satması” (“Fatı və qubernator” adı ilə də məşhurdur), “Şikayətnamə” və s.] haqsızlığı, fırıldaqçı din xadimlərini, rüşvətxor, soyğunçu çar məmurlarını, şöhrətpərəst mənsəb sahiblərini satira atəşinə tutduğu üçün təqibə məruz qalmış, bir müddət Türküstanda yaşamağa məcbur olmuşdur. Dünyanın, insanların vəfasızlığından bəhs edən “İbrətnamə” adlı məsnəvisi, lirik şeirlərdən ibarət “Gülşəni-ürfan” adlı divanı var.

Ə s ə r l ə r i: Şikayətnamə. “Poetik məclislər” kitabında. B., 1987; Ağlar qələm əlində. B., 1989.

Əd.: Qasımzadə F. XIX əsr Azərbaycan ədəbiyyatı tarixi. B., 1974; К ö ç ə r l i F. Azərbaycan ədəbiyyatı. 2 cilddə, c. 2, B., 2005; Azərbaycan ədəbiyyatı tarixi. 6 cilddə, c. 4, B., 2011.