FƏRDİ PSİXOLOGİYA – Z.Freydin psixoanalizinә alternativ olaraq 1910–20-ci illәrdә A.Adlerin yaratdığı dәrin psixologiya cәrәyanı. Şüursuzluğun insan hәyatında müәyyәnedici rolunu qәbul edәn F.p. diqqәti şәxsiyyәtin bütövlüyünә vә vәhdәtinә, şüuri vә qeyri-şüuri proseslәr arasında parçalanmanın olmamasına çәkir. F.p.-nın mәrkәzi anlayışı insanda artıq 3–4 yaşından onun mühitdәki fәal hәrәkәtlәri, tәcrübә vә sәhvlәri әsasında formalaşan hәyat tәrzidir. Hәyat tәrzinә bioloji vә xüsusilә sosial amillәr, o cümlәdәn ailәdәki münasibәtlәr (mәs., bacı vә qardaşlar ilә) tәsir göstәrir. F.p.-nın onu psixoanalizdәn fәrqlәndirәn әsas ideyalarına hәmçinin insanın davranışının mәqsәdyönlülüyü, hәr bir kәsin özü hәll etmәli olduğu 3 hәyati mәsәlә (peşә seçimi, dostluq vә kooperasiya, әks cins ilә münasibәt) vә insanın motivasiyasında özünütәsdiqin aparıcı roluna dair müddәalar daxildir.

F.p.-nın әsas әmәli tәtbiqlәrindәn biri – psixoterapiya vә konsultasiyadır. F.p. tәrbiyәyә, sosial sapmaların profilaktikasına, ailә münasibәtlәrinә geniş diqqәt ayırır. 1920–30-cu illәrdә A.Adlerin Avstriyada yaratdığı fәrdi-psixoloji konsultasiyalar şәbәkәsi özündә psixoterapevtik vә pedaqoji yanaşmaları birlәşdirirdi; bu üsul başqa ölkәlәrdә dә yayılmışdı. R.Dreykurs, H.Ansbaxer, Y.Ratner F.p.-nın görkәmli nümayәndәlәri olmuşlar. F.p.-nın Avstriya, Almaniya, İsveçrә vә ABŞ-da böyük cәmiyyәtlәri var.