FƏRHADİ ƏSĞƏR (d.7.5.1972, İsfahan ostanı, Xomeynişəhr) - İran kinorejissoru, ssenarist, prodüser. Tehran və Tərbiyət-e-Müdərris un-tlərini bitirmişdir (1996). Kino fəaliyyətinə 1986 ildən qısametrajlı filmlər çəkməklə başlamışdır. Rej.-un “Toz içində rəqs” (2003) ilk tammetrajlı filmi bir neçə nüfuzlu festivalda mükafatlara layiq görülmüşdür. Digər filmləri: “Gözəl şəhər” (2004), “Ellinin tarixçəsi” (2009), “Nadir və Siminin boşanması” (2012, “Qızıl qlobus” və “Oskar” mükafatları), “Keçmiş” (2013, xarici dildə ilk filmi; baş rolda fransız aktrisası B.Bejo çəkilmişdir; Beynəlxalq Kann kinofestivalının mükafatı), “Kommivoyajor” (2016, Beynəlxalq Kann kinofestivalının mükafatı; “Oskar” mükafatı, 2017). Çəkdiyi filmlərin çoxunun ssenari müəllifidir. F. 2011 ildə 62-ci Beynəlxalq Berlin kinofestivalında münsiflər heyətinin üzvü olmuşdur.
F. “xarici dildə ən yaxşı film” nominasiyası üzrə iki “Oskar”a sahib olmuş ilk və yeganə müasir rej.-dur.
