FƏRHADOVA Sevil Məmməd Tağı qızı (d.31.7.1947, Bakı) - Azərb. musiqişünası. Sənətşünaslıq doktoru (2006). Azərb. Dövlət Konservatoriyasını (1970) bitirmişdir. 1977 ildən Azərb. EA-nın Memarlıq və İncəsənət İn-tunda fəaliyyətə başlamış, “Musiqi folkloru” (sonradan “Azərb. musiqisinin tarixi və nəzəriyyəsi”) şöbəsində böyük elmi işçi, aparıcı elmi işçi, 2007 ildən şöbə müdiri işləmişdir. 2013 ildən AMEA-nın Memarlıq və İncəsənət İn-tunda “Muğamşünaslıq” şöbəsinin müdiridir. Əsas tədqiqatları Azərb. ənənəvi musiqisinin nəzəri, fəlsəfi, kulturoloji və tarixi problemlərinə həsr olunmuşdur. 130-dan çox elmi əsərin, o cümlədən 4 monoqrafiyanın müəllifidir. Azərb. Milli Konservatoriyasında pedaqoji fəaliyyət də göstərir.

Ə s ə r l ə r i: Обрядовая музыка Азербайджана. B., 1991; Муга-монодия как тип мышления. B., 2001; Azərbaycan muğamşünaslığı: problemlər, perspektivlər. B., 2015; Azərbaycan muğam dəstgahının tarixi kökləri (Azərb. və rus dillərində). B., 2018.