FƏRRUX BƏY (1547-17 əsrin əvvəlləri) - Azərb. miniatür rəssamı. Siyavuş bəyin qardaşıdır, Təbriz və Qəzvində saray kitabxanasında işləmiş, portretlər (“Əsir düşmüş sərkərdə Bayramoğlan”, “Gənc qız badə ilə”, “Şair bağda”; hamısı Boston İncəsənət Muzeyindədir, ABŞ) və kitablara illüstrasiyalar (Sədi, “Gülüstan” və “Bustan”, Rza Abbasi muzeyi, Tehran; Ə.Cami, “Həft övrəng”, Topqapı muzeyi, İstanbul) çəkmişdir. 1576 ildə Hindistana, təqr. 1583 ildə Kabilə, 1585 ildə Lahora getmiş, uzun müddət Moğol hökmdarları Əkbər şahın [1556-1605] və Cahangir şahın [1605-27] saraylarında fəaliyyət göstərmişdir. Hindistan dövrü yaradıcılığına Moğol miniatür məktəbinin təsiri olmuş, burada bir sıra portretlər çəkmişdir (“Şahzadə Pərvizin portreti”, Gülüstan muzeyi, Tehran; “Şahzadə tutuquşu ilə”, Çester Bitti kitabxanası, Dublin; “İbrahim Adil şah şahinlə ovda”, REA Şərqşünaslıq İn-tunun fondu, S.Peterburq).

 Fərrux bəy. “İbrahim Adil şah şahinlə ovda”. 1590-95.