FƏTƏLİYEV Ramiz Məmmədəli oğlu (d. 7.6.1946, Bakı) - Azərb. ssenaristi, kinorejissor. Azərb. Resp. xalq artisti, Azərb. SSR Dövlət mükafatı laureatı (1986), əməkdar incəsənət xadimi (1987). Azərb. Neft və Kimya İn-tunu (1970) və Moskvada Ali ssenari və rejissor kurslarını (1972) bitirmişdir. “Azərbaycanfilm” kinostudiyasında baş redaktor (1985-86) və direktor (1987-95) olmuşdur. 50-dən artıq filmin ssenari müəllifidir. “Həyat səhifələri”, “Mən sizi həyatım qədər sevirdim”, “İş üzrə şahidlər”, “Xüsusi vəziyyət”, “Birisi gün gecəyarısı” (1981, M.Avdiyev və A.Donetslə birgə), “Yaramaz” (1988), “Nakəs” (1991) və s. Çoxseriyalı “Bir anın həqiqəti” (ssenari müəllifi və rej., 2003) televiziya filmi 1990-cı illərin ortalarında Azərb.-da baş verən siyasi hadisələrə həsr olunmuşdur. Azərb. SSR Ali Sovetinin (12-ci çağırış) deputatı, Azərb. Resp. Milli Məclisinin üzvü (1-ci çağırış) seçilmişdir. Azərb. Resp.-nın Şöhrət ordeni ilə təltif edilmişdir.