FİKRƏT MÜƏLLA (soyadı Sayğı) (1904, İstanbul - 20.7.1967, Fransa, Nitsa; 1974 ildə cənazəsinin qalıqları Türkiyədə yenidən dəfn olunmuşdur) - türk rəssamı. İstanbulda təhsil almış, sonra mühəndislik sənətini öyrənmək məqsədilə Almaniyaya getmişdir. Almaniyanın bir çox şəhərində, İsveçrə və İtaliyada olmuşdur. Rəssamlıq sənətinə 1920-ci illərdə gəlmiş və rəsmləri Almaniyanın məşhur jurnallarında çap olunmuşdur. 1934 ildə Türkiyəyə qayıdan F.M. Nazim Hikmətin “Varan 3” kitabına illüstrasiyalar çəkmiş, müxtəlif operetta tamaşaları üçün geyim eskizlərini vermişdir. Məşhur türk rəssamı А. Dinonun təklifi ilə 1939 il Nyu-York Beynəlxalq yarmarkasında türk pavilyonu üçün İstanbul mövzusunda 30 panno işləmişdir. Həmin vaxtdan sonra Parisdə yaşamışdır. Əsərlərindən ibarət 3 sərgisi (1954, 1957, 1958) olmuşdur. Fovizm və ekspressionizm üslubunda işləyən Ғ.М. rəsmlərində daha çox narıncı, qırmızı, mavi, bənövşəyi fona üstünlük vermişdir. Əsərləri: “Oturan adamlar”, “Mavi natürmort”, “Kanalda gözləyən katerlər”, “Bənövşəyi fonda fiqurlar”, “Balıqçı”, “İstanbul qala divarları”, “Şar satan”, “Amerikan barı”, “Peyzaj”, “Parisdə bir kuçə” və s. əsərlərinin çoxu şəxsi kolleksiyalarda, bir neçəsi İstanbul Rəsm və Heykəltəraşlıq Muzeyində saxlanılır.

 
Fikrәt Müәlla. Şar satan. 1961. Eczaçıbaşı özәl kolleksiyası.