FİLODENDRON (Philodendron) – aroidlәr fәsilәsindәn bitki cinsi. Hәmişәyaşıl, ilişәn, yaxud uzun hava köklәri olan, әsasәn, lianaşәkilli, bәzәn ağacşәkilli epifitlәrdir. Yarpaqları iri, tam, dilimli, yaxud ikiqat yarılmışdır; növbәli, yaxud spiralvarı yerlәşmişdir, hәr buğumaralarında çox az inkişaf edәn (hәtta aroidlәr arasında) 2 yarpaq ayası var. Çiçәk qrupu ağ, sarımtıl, yaxud qırmızı örtüklü qıçadır. Çiçәklәri bircinslidir, çiçәkyanlığı yoxdur, oturacaqda dişi, onların üzәrindә erkәk çiçәklәr, yuxarı uc hissәsindә çox vaxt inkişaf etmәmiş steril çiçәklәr olur. Meyvәlәri gilәmeyvәdir. F.-un bir çox növlәri zәhәrlidir; bәzi növlәrinin gilәmeyvәlәri yeyilir. 300-dәn (digәr mәnbәlәrә görә 500-әdәk) çox növlәri Mәrkәzi vә Cәnubi Amerikanın tropik zonalarında bitir. Mәxmәri F. (P. hederaceum), ikiqat lәlәkvarı F. (P. bipinnatifidum) vә s. binaların yaşıllaşdırılmasında geniş istifadә olunur.

 Mәxmәri filodendron (P. hederaceum).