FİNLANDİYA ATI, f i n   a t ı (fin dilindә Suomenhevonen, ing. Finnhorse) – Finlandiyada yayılmış at cinsi. Mәnşәyi dәqiq mәlum deyil; cinsin mövcud olması 3000 ilә yaxındır. Yerli әhali onu qoşqu vә minik atı kimi işlәdirdi; hәm dә süvari qoşunda, meşә vә k.t.-nda, yük daşınmasında istifadә olunurdu. Güman edilir ki, ilk dәfә meşә tipli kiçik atlar olmuş, 19 әsrdә Orlov löhrәmi vә Norfolk atlarının qanının calanmasıyolu ilә onların eksteryeri, boyu vә cәldliyi xeyli yaxşılaşdırılmışdır. 1907 ildә F.a.-nın baş damazlıq kitabı yaradılandan sonra cins tәmizlikdә yetişdirilir. Müasir F.a.-nın cidov hünd. 148-dәn 162 sm-әdәk (orta hesabla 152 sm), çәkisi 500–600 kq-adәk olur. Rәngi, әsasәn, açıq vә tünd-kürәn, yalı vә quyruğu çox vaxt açıq rәnglidir. Hәmçinin kәhәr, qonur, ağyallı vә ağquyruqlu cinslәrinә rast gәlinir. Bir qayda olaraq F.a.-nın üzündә vә ayaqlarında çox sayda iri nişanları olur. F.a. dünyada genofon- dunda alarәngli spleşed uayt tipli faktor olan nadir at cinslәrindәn biridir.

 Finlandiya atı.